Ass n umacûr
Ass n umacûr
(Illustration: Gwen)
Ghass-ad nkerent d timgharin urta d tagh tafukt ad d agwment aman gh targwa urta gis swin igdâd. Tizi da gh d wurint, asint d yan ifer n ughanim d yatt têzlit n lfessâ d yatt tackâdt n lwerd smunent ten, assent ten s ifer n ughanim. Asint d anas n waman da d ugwment sglent gis ifrawen d tackâdin, ruccent issen tarwa nsent gh ida gh sul genn, ruccent issen lbhayem d ulli d lxzin, ula kullu tigmmi. Ad tili lbarakâ gh kullu mad ruccant. Tassaat lli gh d nkeren lhêcum, gent asen tazûlt i wallen. Tihêcmiyin asint d ifulan n tadût, yan uzgwagh; yan wadal, yan lûk d yan uqcariy, llement ten ard gun yan, qwent t i umgêrd: han tazra n umacûr…
Ass ann tella taacurt, kullu ayt tmazirt da tmaghan s waman, ar timgharin ula irgazen. Ar tidunt timgharin ad zûrent gh umzdagh wida mutnin, zrint ad zûrent sidi Hssi-Ali.
Talgwat lesen d yan-sin lhêcum ilmawen n izger d izimer, iles d yan gisen timlsa n tmghart, igu taslit n buxxu n umacûr. Gh tmazirt kud yan iqqen tiflut nes, ar tkkan id buxxu tigmmâ, ar tjaran, kiwan d ma sen fkan; kra tiglay, kra sskwâr d watay… Amcum nna di tufa luqt ur iqqen tiflut nes, kcemen as s tgmmi, anna n ufan igu winsen. Tassaat ann kullu lhêcum kwmcen gh yatt tghzût, ar t gis tctta tawda…
Ghyîd, munen id buxxu n umacûr gh yatt tgmmi gh ur telli tmghart, smeren gis gaylli smunen, bdûn t d lhêcum.
Tezlit: une tige
Tackadt: une branche
Xzin : pièce où l’on stock les aliments
Lûk : marron